Nathan
Kryukovsky (9) and Madam Slou Saparovna
Links: Molly Reeksting, (5) en regs: Fatima Dia (5)
Rus help
kinders kwale wegdans
In
Pretoria is ’n Russiese balletjuffrou wat wondere verrig deur gestremde kinders
te leer dans, skryf
Ballet
het Madam Slou Saparovna gehelp om haar fisiese gestremdheid te oorwin. Nou
help sy ander kinders om dieselfde te doen. Elaine Swanepoel en Theana Breugem
(fotos) het dié Russiese danser in haar dans ateljee in Pretoria besoek
In ’n
beknopte dansateljee bokant ’n klerewinkel in Centurion brei Slou Saparovna
Akimguereeva haar jong dansers op die Russiese manier – met dissipline, harde
werk en hope liefde.
Hier,
tussen plakkate van bekende balletopvoerings en foto’s van stralende dansers
teen die mure, leer sy gestremde kinders “vlieg”.
Nes
ballet háár leer vlieg het toe sy skaars kon loop.
Met ’n
tegniek wat sy spesiaal ontwikkel het, rehabiliteer sy gestremde kinders deur
hulle basiese balletoefeninge te laat doen wat hul spiere versterk.
En Madame
Slou – soos haar leerlinge haar ken – se bekendheid strek tot ver buite
Centurion. Verlede jaar is sy deur die Russiese president, Wladimar Poetin,
vereer vir haar bydrae tot kuns, kultuur en onderwys.
Ondanks
dié eerbewys vertel sy dat sy dalk binnekort gedwing gaan word om Suid-Afrika
te verruil vir ’n land wat “ballet as kuns waardeer”.
Die rede?
Binnelandse sake en haar stryd om haar werksvisum te hernu.
Akimguereeva
se kort, gespierde bene beweeg met verstommende soepelheid soos sy die nou al
bekende danspassies uitvoer.
Op die
ouderdom van 53 kan sy nog haar been moeiteloos na haar oor bring. En om te
dink dokters het aanvanklik voorspel sy sou teen dié tyd lank reeds in ’n
rolstoel wees.
Madame
Slou is gebore met trauma in haar rugmurg en polio is ’n jaar later by haar
gediagnoseer. Dit het haar spiere so verswak sodat sy eers op drie leer loop
het.
“Ek mag
nooit as kind gehardloop het nie omdat my beenstruktuur vreeslik broos was. As
ek ’n been sou breek, sou dit nooit weer herstel nie,” sê sy.
Om haar
bene sterk te kry het haar ma haar swem, ritmiese gimnastiek en ballet laat
doen.
Op die
ouderdom van nege is sy deur die balletakademie in Almaty, Kazachstan, aanvaar.
Haar toestand het deur die jare tot so ’n mate verbeter dat sy skaars tien jaar
later die hoofrol in ’n Russiese balletproduksie gedans het.
Sedertdien
het sy in talle internasionale produksies soos Swanemeer, Don Quixote en
Giselle gedans.
“Dokters
sê as ek nie ballet op dié vlak gedoen het nie, sou ek lankal ’n rolstoel moes
gebruik,” sê Akimguereeva.
Weens
haar mediese probleme kon sy egter nooit ’n voltydse danser word nie en het sy
haar as choreograaf en dansinstrukteur by die Russiese akademie van teaterkuns
bekwaam.
In 2005
het die South African Ballet Theatre Academy haar genader om die
Waganowa-metode, ’n uniek Russiese tegniek, aan Suid-Afrikaanse dansers te
leer.
Vandag
staan sy aan die hoof van die Russian Ballet and Dance Academy of South Africa
en rig sy 24 jong dansers in dié unieke Russiese tegniek af.
Nou en
dan kom klop daar selfs ’n skool se sokkerspan by haar aan vir oefeninge wat
die spelers se soepelheid verbeter.
Sy is
verlede jaar bekroon met die nasionale orde van die Russiese Federasie vir
burgers wat in die buiteland woon.
“As ek
ballet doen, is ek vry. Dit voel asof ek kan vlieg. Ek wil hê my studente moet
dieselfde genot uit ballet put as ek.”
Sedert
2012 help sy ook liggaamlik gestremde kinders om hul spiere sterk te kry, deur
’n rehabilitasieprogram wat sy self ontwikkel het.
“Jy moet
sterk wees om ballet te kan doen. Dit is die volmaakte balans tussen krag,
soepelheid en postuur. Elke spier strek wanneer jy ballet doen en dit help jou
spiere ontwikkel.”
Sy glo
enige gebrek kan oorkom word deur liefde en die regte liggaamsoefeninge om swak
spiere te ontwikkel.
“Ek het
’n besonder sagte plek vir gestremde kinders. Ek weet hoe dit voel en ek wil
hulle graag help om hul volle potensiaal deur ballet te bereik.
